ما تزوقيني يا ماما

منقول بقلم نورماندى

ما تزوقيني يا ماما قوام يا ماما ده عريسي ربنا ها ياخده بالسلامه يا ماما ....

----------------------------------------------------------

ها احكي هنا على مواقف اتعرضت ليها من خلال رحلتي في مقابلة العرسان...على امل ان يتم زواج ...

ها ابدأئها من الاخر للأول .... وعلى قد ما تسعفني ذاكرتي ..ها سرد واقول ...

سيري يا نورماندي ...

الكلام ده من حوالي اسبوع ...

بالتحديد كان يوم التلات ال هو تاريخ ...19/2/2008 ها تقولوا فاكره ازاي يا اروبه اقولكوا ذاكرتي دي تعباني اصلا بفتكر ادق التفاصيل وممكن انسى اسامي البني ادمين عاتشي يعني ....

اليوم ده كنت الصبح في مكتبي...

ماما كلمتني حوالي 11.30 وبتقولي .. ان طنط فلانه ( صاحبة ماما ) ليها واحده صاحبتها ... وان صاحبتها دي عاوزه تيجي تزورنا هيا وابنها انهارده ..فمامتي بتقولي وراكي كورس انجليش انهارده ..قولتلها طبعا قالتلي طيب غيبي فولتلها كلا البته والوزه ... العريس ولا الكورس ..ده الكورس لوحده مدفوع فيه قد كده عشان 66 ساعه اقوم اضيع انا منهم ساعه لا ما ينفعش طبعا ...

قالتلي طيب يجوا امتى ... بصيت في جدولي الفاضي ال ما فيهوش غير دوام الشغل وكورس الانجليزي ... وقولتلها الساعه 8 مساءا .... قالتلي متأخر يا بنتي ..قولتلها ماشي يا ماما استنوني ...

بليل على حوالي 6.45 كنت خلصت الكورس وقولت انزل اصلي العشا هنا عشان ما اتاخرش واقعد شويه في الكافتيريا ... اروق اعصابي ...
صليت وطلعت قعدت مع واحده صاحبتي بس ما طولتش قالتلي على فين العزم قولتلها عندي عريس ...قالتلي يا قلبك وجايه وبتحضري ما اخدتيش اجازه انهارده ليه على الاقل ما تكونيش مرهقه كده ... قولتلها يا ستي متعودين ...وعلى الارهاق ها استحمى وابقى كويسه ...

رجعت البيت ... اخدت شاور .. وروحت لبست وانا بحط اللمسات الاخيره في لبسي قولت لماما اديني تفاصيل ... قالتلي فلانه مامته ..ست متدينه وتعرف صاحبتي فلانه من حضورهم دروس دينيه في المسجد ..( في سري قولت ..ماشاء الله ..والله كويس دي بشرة خير ) وابنها خريج ادارة اعمال من جامعة مش عارف ايه في بريطانيا ( قولت الحمد لله يعني مثقف ودماغه نضيفه ) وبيشتغل مش عارف في مجموعة شركات ايه ..قولت والله كويس ... الشركه دي مش اي كلام ومش اي حد بيشتغل عندهم ...
المهم خلصت لبس حوالي 8.15 وكنت مستعده للقاء ...

*******************************************************

الست اتاخرت وجات 8.30 ... وجات لوحدها من غير سعيد الحظ العريس ... قعدت في الصالون ...
ماما قعدت وشويه ودخلت انا ...
وقعدت جمب طنط دي ...
اول ما قعدت ...ادتنتني سي دي وشريط وكتابين وكلهم كتب دينيه ودعويه ....

شكرتها كتير ..مش كل مره باخد انا الحاجات دي ...جديده الزياره دي عليا ...
ماما بتسألها طيب ابنك فين ..ردت قالت لها ...اصله انشغل .عنده اجتماع ..وبعدين ما انا هنا اهوه ..وهو قايلي على المواصفات ال عاوزها ... ؟؟؟ المواصفات ال هو عاوزها .... المواصفات ال هو عاوزها ... الكلام بيتكرر في دماغي ولا كأني شريط وسف ...على اساس انها جايه تشتري غساله ... طيب يعني لما تعايني ها تاخد هديه عليا ...ولا اقولها اني عليا ضمان عشر سنين ... وتاخد الكاتلوج وهيا ماشيه ..وتوريه للعريس ...

سكت ... وقولت عاتشي عنده اجتماع ويمكن العيله دي اسلوبهم كدا ...
بدات تتكلم عن نفسها انا الداعيه الفلانيه ... بدي دروس في الحتت الفلانيه ... وبحاضر في المساجد الفلانيه ... ودرست 4 سنين العقيده ...وحصل الموقف الفلاني مع الشيخ الفلاني والموقف العلاني مع الداعيه الترتاني ...
وانا اسمع واسكت ..
سألتني ... بتحضري دروس دينيه ... قولتلها لا يا طنط ..
قالتلي ليه ...قولتلها انا دوامي بيخلص 6 بليل ,,,وحاليا باخد كورس بياخد من 3 ساعات يعني يومي بيخلص 9 بليل ...ولو في اي محاضره بتنتهي المحاضرات 5 اصلا ...
فعادة المحاضرات بعد العصر او المغرب ...فصعب عشان شغلي ...
قامت قايليلي ...ده الشيطان هو ال بيثبطك وعارف يدخل من اي مدخل عشان يلهيكي ... ( في عقل بالي شيطان ايه ال ها يتدخل في الدوام وعدد ساعات العمل ده )
رديت قولتلها يا طنط ما الحمد لله بجيب شرايط دينيه لفلان وفلان وفلان وبسمع علطول في عربيتي ..غير الكتب ال بشتريها وكل الكتب ال بجيبها دينيه فالحمدلله مثقفه نفسي بنفسي ...
قالتلي بس بردوا مش كفايه ..قولتلها اتمنى يتوفر ليا وقت واقدر احضر ....
راحت تكلم ماما ... وقعدت تكلمها عن احاديث دينيه كتير جدا ...وكلمات تقولها لماما الست البسيطه ال بجد بجد ما تعرفش عن الشارع اي حاجه ولا عمرها تطلع لوحدها ونادر ما تطلع ولا تحتك بحد كلام تقيل جدا انا ال دارسه وبقرا كتير كنت بعدي الكلمه من وداني على متصفح لغوي في دماغي عشان افهمها عشان اقدر اتابعها ... تقوم تقول لماما بعد الاحاديث دي وانتي بتقري لمين او تسمعي لمين ...
ماما السكر قالتلها انا بسمع وجدي غنيم وعمر خالد ... فاكره يا ام فلان وجدي غنيم لما اتكلم عن ان الواحده لما تيجي تقمع باميه وتسبح ربنا وقال شوف طعم الباميه ايه ..

******************************
انا بقى في سري الله عليكي يا ماما ... هيا دي ..خانقانا بمصطلحتها من بدري ...قولي يا ماما .. كمان وكمان ...اديها يا ماما .. وقعدت تقول امثله للست من نفس العينه دي وكلها امثله قالها وجدي غنيم ... وانا نفسي ازغرط لماما بعد كل مثل ..ما الست مش قادره ترد ...
الست قامت مغيره الموضوع وقالت لها ...انتي مش حافظه القران ...ماما قالت لها لأ ...الست استلمتها وخلت ماما وشها يبقى احمرررررررر ... ازاي ما تحفظيش قران ...ازاي ..قالتلها معلش اصل انا من النوع ال بينسى بسرعه ..بس برضوا حافظه سور معينه وايات بتعني في الصلاه ..دي تقولها برضه ازاي ده انا عندي واحده اميه لا تعرف تقرا ولا تكتب وحافظه القران ..ده انا عندي واحده عمرها كبير جدا وحافظه القران ....
في سري قولت ..يعني انا بنتها ... ومعظم اوقات فراغي بكرسها للقراءه لشيء ديني او اسمع شيء ديني ومش حافظه القران ... على كده لازم اكون حافظه القران ...والاحاديث السنيه كلها .. واكون ضليعه بالفقه والتوحيد ..ولازم اكون عديت على جميع البحوث الخاصه بوقت الرسول عليه الصلاة والسلام وجميع الغزوات ...عشان لسه شابه ...
ده امي الست البسيطه استلمتها الاستلامه دي ..انا ها تعمل معايا ايه ... قولت لها ان حفظ القران فرض كفايه وربنا يرزقنا حفظه ان شاء الله ...
المهم طول القعده على الحاله دي وماما كانت محرجه بشكل فاضل دقيقه وتعيط ... من كم الاحراج ال الست دي عاملهولها ..
قولت بسسسسسسسس ...كفايه قوي لحد كده ...

*****************************************
كنت عامله لها طبق فواكهه ... ومقطعهاه بايديه وحياة عنايا ... وكان محطوط بيني وبينها ...
جبت شوكه تانيه ..وقعدت اكل معاها فيه ...استخسار مش اكتر والله ....

شوية لقيت ابن اخويا وابن اختي دخلوا اطفال .... ابن اختي عمره سن ونص ماشاء الله جسمه مليان ... ما هيا ماما مستلماه يبقى لازم يملى ... المهم شاور على عنب من الطبق المحطوط فماما بتديله حباية عنب تقوم الست تقول ده مليان هو هرمونات جسمه بايظه ؟؟؟
بايظه ..نعممم ...قولتلها لا احنا الحمدلله صحتنا لحد سابع جد ( واخدين بالكم من سابع جد دي ) كويسه وما عندناش لا هرمونات بايظه ولا امراض مستعصيه مفيش ظاهر غير الضغط والسكر وده بس جه للكبار عشان اتكند عليهم في موقف او حد ضايقهم فجالهم الضغط او اتحرجوا في قاعده فجالهم السكر ...اما امراض مستعصيه فلله الحمد كلنا بخير لحد سابع جد ... على فكره الواد عيان من يومها وعنده سخونيه جامده وما بياكلش وخس جدا ...انا شايفه رقبته بقت رفيعه جدا ..الست نقت على الواد ...ما قالتش حتى ماشاء الله ...
قولت لازم انا اتكلم بقى ... فايه ال اقدر اتكلم فيه كويس ...بالظبط كده ...الجمعيات الخيريه ومساعدة الاخر ...
وبدات اكلمها عن الجمعيات الخيريه ونشاطاتها واقولها عن روح ...وفي سري قاعده اقول ربنا يكرمك يا نفرو ... ما هيا حسستنا اننا معارف ابو لهب وبنسهر معاه كل ليله ... يبقى تعالي بقى نخلي الكوره عندي والعب من ملعبي انا ... لما كلمتها عرفت انها ما لهاش احتكاك بالجمعيات الخيريه قد كده قولت بس ..خدي بقى ..
تك تك تك .... ما سكتش ...ده ماما كان فاضل لها دقيقه وتقول يا ارض انشقي وابلعيني ...لا لالالالالا...
ما سكتش الا لما سكتها وما خلتهاش تعرف ترد ... ومش بس روح لا كلمتها على الجمعيات ال في قطر ونشاطها وشغلها بره وجوه ..ما صدقت اساسا ... امسك في مجال ...ما احنا مش كفار ...

**********************************************

فا ماما تقولها تشربي حاجه ..قالتلها شاي ..جبنا الشاي ...وقالت لها ماما كام معلقة سكر ...الست ردت وقالت كفايه السكر ال قاعد جمبنا تصدقي مستخسراها في الجواز ..
...تصدقي انا نفسي مستخسراني في الجواز ... يا تنت ...

الشاي يا تنت ...
وقعدت تقول لماما انتي مستعجله عليها في الجواز ليه ... ( ايه مستعجله دي هو احنا اصلا كنا بنجري ورا الست ولا نعرفها اساسا عشان نكون مستعجلين ولا بطيئين حتى .... استغفر الله العظيم يا رب ..)

ماما قالتلها نفسي اطمن على بنتيي وافرح بيها ... قامت تقولها بس بجد دي كويسه وبتعمل خير تجوزوها ليه ( هيا مالها اساسا اتجوز ولا اتنيل هيا مالها ..جايه تخطب دي ولا جايه تستهبل ) ... روحت انا رديت عليها ...مش كده بردوا يا تنت ...انا نفسي بقول لماما تجوزيني ليه ...بس ماما عاوزه تطمن ...بس كويسه يا تنت قولتلها كده عشان ما تلحش عليا تاني ...
وبعدين بتقول لماما انتوا هنا من امتى ...قالتلها من سنة كذا وعيالي ماشاء الله عليهم خمسه ... وانا في سري يا ماما ما تتكلميش عننا كتير كفايه ال قالته على الواد .. وتنت سالت ماما بابا بيشتغل ايه .. ماما قالتلها ..
باباها : (........... ..) ومثقف ..وبيقرا قران كل يوم .. وجميع الفروض في المسجد
اخوها الكبير ...مهندس وبيصلي الفجر حاضر ... ومتجوز ومسمي ابنه عبدالرحمن ...
هيا خريجة تجاره .. وما بنشوفهاش كتير ..
اختها الاصغر منها مدرسه وده ابنها ال مليان زيها ... واسمه احمد
اختهم ال بعدهم : في كليه تجاره في مصر وكانت في علوم وحولت عشان زهقت ومخطوبه ..
اخوهم الصغير عنده 12 سنه وفي اعدادي ...
فبتقولها وعيالك عايشين معاكي هنا في نفس البيت ...ماما قالت ايوه عشان الايجارات وهما في مقتبل حياتهم ...
فقالت لماما ومين بيصرف على البيت هنا ... قالت لها الحج ربنا يكرمه مش مقصر ...
طيب هيا مالها اساسا ... مين قاعد مع مين ومين بيصرف على مين ...
فا تنت بتقول لماما ... وهما في مصر قاعدين معاكم ...
قالتلها لا ابني قاعد في نفس البيت بس شقه لوحده وبنتي في نفس الشارع بس بيت لوحدها ... اصل بحبهم يكونوا حواليا ..
فا تنت بتقول لماما طيب بنتك لما تتجوز قصدها عليا وبعدين قعدت في حته بعيده وجوزها مش عاوزها تروح بلد تانيه ولا تروح لاهلها ...
ماما قالت ...ها ابقى اروح لها انا ... على الاقل اتفسح بره بلدنا ... وازور بنتي ..
تنت :
انتوا بتحبوا مصر ازاي ..ده مفيش حد عندنا بيحبها ... وما بننزلهاش ..ده ابني ما شافش مصر من اكتر من 11 سنه ... واهلي سابوا مصر وعايشين في اوروبا ... ولما بحتاج اشوف والدتي بسافر لها اوروبا ... بس والله صراحه بنكسف اقول للناس انهم عايشين في اوروبا ... عشان جو الفساد ..

***************************************
روحت قولتلها يا تنت ... عمر المكان ما أثر على انسان ...الانسان هو ال بياثر في المكان ... فليه تتحرجي من حاجه زي دي بالعكس ...يا تنت ...
وراحت قالت لماما ..بس بتنزلوا مصر كتير ليه ..قالتلها انا معوده عيالي على كده والبلد هنا مش دايمه لنا ...ما عجبهاش الكلام ...
المهم هيا حست انها اتاخرت ...فقالت لماما ها ابقى اتصل بيكي عشان نحدد موعد عشان الولاد يتقابلوا ... وربنا ييسر ...

هيا مشيت من هنا ...وقبل ما انطق او اعترض .. او اقبل او اشجب او استنكر ...
ماما قالت الموضوع منهي خلاص ...
سؤال الحلقه ...

متى تكلمت تنت عن ابنها العريس خلال اللقاء الذي حدث بينها وبين ام نورماندي ونورماندي ؟

وانتظرونا في الحلقه القادمه ....اقصد العريس ال قبله ده ... تابعونا تجدوا ما ينقطكم ..ولو ما اتنقطوش ...اتنقطوا ليا سلف .

التالي ... العريس التاني وصل

كان الكلام ده قبل الاولاني بحولي 3 اسابيع ....

العريس ال جه ده المفروض انه صديق لجوز اختي ... فهو طلب من جوز اختي انه يتقدم ليا ...فجوز اختي قاله اتفضل وكل ال عليه انه يرتب للقاء ده ...

المهم ماما قالتلي دخلت الناس البيوت مش سهله وجوز اختي قالي تعالي اقعدي معاه في مكان بره قولتلهم زي ما تحبوا ...

في اليوم الموعود بردوا رجعت من الشغل على الساعه 6.30 والموعد كان 8.30 ...

المفروض اختي جايه معايا وكمان ابنها وجوز اختي ...

رحنا احنا هناك والعريس ده جه علينا ....

المفروض اننا ها نروح نقعد في اي كافيه من الموجودين في المنطقه ال كنا فيها لانها منطقه سياحيه وفيها كل الكافيات ...

طبعا جوز اختي قالوا اختار الكافيه ال تحبه ...

قام هو مختار اكتر كافيه بكرهه في الدنيا ...

( في سري وانا ماشيه بقول ... ملقتش غير ده خييير خييير )

رغم ان حوالينا مش ااقل من عشر كافيات ...يقوم ينقي ده ..ما علينا ...

كمان قعدنا في ساحة الكافيه بره والنور كان سيء جدا يومها

( في سري ..كمان النور بايظ هيا ناقصه سواد خييير خييير )

جوز اختي واختي وابنهم قعدوا على تربيزه جمبنا ...

قعدنا احنا كمان ...

_______________________________________________________

لقيته بيشاور لواحد من ال بيشتغلوا في الكافيه وال هو مسؤول عن التربيزه ال كنا قاعدين عليها ( ركزوا في الحته دي ) طلب منه حاجه ما سمعتهاش ..
رجع عامل المطعم ده ومعاه علبتين سجاير ومعاهم بقية الفلوس ..
قام هو عمل ايه ... واخد فكه كتير من الباقي ال رجعله واداه للعامل ده كانه بيديله صدقه ال هيا يحطها في ايده كاني مش ها اشوف يعني ... طيب ما كان يستنى لحد ما يجي الشيك في الاخر ويدفع التيبس واكيد اكيد ال بيخدم التربيزه ال كنا قاعدين عليها ها ياخد التبس له ( البقشيش ) لزمته ايه ..حتى العامل بص ليا ومش فاهمه بيبص ليا ليه انا مالي هو انا ال احرجته يعني ...
وقالي اصل ما لقتش سجاير في الطريق ..
فرديت قولت له ..كويس يارب دايما ما يبقاش سجاير لحد في الدنيا كلها ..
هو ...هاهاهااههااهها انتي بتكرهي السجاير ...
قولتله اه بكرهها .
( في خلال الساعه ال قعدناها كان تقريبا اول علبه قربت تخلص والطفايه الفاضيه اتملت اعقاب سجاير )
واصلا انا بتعب من دخان السجاير ووضحت ان بضايق منها يقوم شارب كل الكميه دي ...
شكله كان فاكر نفسه رافت الهجان وعمال يحرق في سجاير ويشرب قهوه عشان يوقع العميل ال قدامه ال هيا انا ويخليها تعترف بالماضي واللاحق والمستقبل وبعد الممات ...

المهم ..
قالي تشربي ايه .. اخدت القائمه ...واختارت عصير اناناس بالتلج المتكسر ...وكان يومها الجو بارد جداجدا ..مش عارفه اساسا ليه اختارت اناناس في الساقعه هو اه انا بحب الاناناس جدا بس الجو كان برد ..
هو طلب قهوه ( كذا مره )

_____________________________________________________

سالني ..ها اسمك ايه ....
انا .. في سري ..طيب كان يسال جوز اختي قبل ما يجي ..ما علينا ..قولتله ..نورماندي ...
هو قالي انا اسمي فلان ... معايا بكالوريوس خدمه اجتماعيه بشتغل في الحته الفلانيه ...باخد راتب قد كدا ..ا ...ساكن مع اختي وجوزها ... عندي شقه في طنطا لسه بدفع اقساطها ..وعندي عربيه هنا بدفع اقساطها . ... وبدفع قد كده للشقه وقد كده للعربيه ...
( انا في سري اومال بيعيش بقية الشهر ازاي ..ده ال باقي ما يكفيش ميه معدنيه لاخر الشهر )
(كل الكلام اخده على نفس واحد ) شكله حافظ مش فاهم ...
سالني ...خريجة ايه ..قولتله تجاره ...
قالي بتشتغلي فين ..قولتله في المكان الفلاني ...
قالي مرتاحه في شغلك ..قولت الحمدلله ...
قالي انا بقى مش مرتاح في شغلي خالص وتعبان جدا ومش عارف انقل كفالتي ومش عارف احسن وضعي وبشتغل كتير جدااااااا وفيه موظفين قطريين ما بيشتغلوش ربع شغلي وبياخدوا رواتب كبيره جدا ..وانا شايل كل حاجه على دماغي وهما مرتاحين ...ورواتبهم بتروح لهم كل شهر ... وحاولت انقل نفسي قسم المبيعات رفضوا وبتوع المبيعات بيدخلهم مش ااقل من 40000 الف في الشهر ده غير اساس المرتب ومتوفر لهم كل حاجه ...
انا :

( انا في سري ..ايه الحقد ده ..طيب ما يقول ربنا يبارك ..يقول ربنا يوفقهم ..اي حاجه من الكلام ده )
ده انا زهقت خالص واتخنقت من البلد دي ... ناس بتطفح الدم وناس بتقبض رواتب على الجاهز ...
( انا في سري ..لا حولا ولا قوة الا بالله ... )
قام سألني ... انتي مرتاحه هنا ..؟؟
قولتله الحمدلله ...
قالي : مش بتفكري ترجعي مصر ؟؟
قولتله ..ربنا لما يشاء محدش بيقول اقعد هنا ولا اقعد هناك ...وبالنسبه ليا مفيش مشكله اني ارجع مصر عادي ..المهم اكون مرتاحه وانا حاليا مع اهلي مرتاحه ..
قالي .. انا بقى مش مرتاح وتعبان جدا وعاوز اخلص اقساط الشقه ال اصلا اخواتي اجبروني اشتريها عشان عارفين عمري ما ها اشتري حاجه ... فدفعوا تمنها كامل عشان اظطر اسدد تمنها غير كده ما كنتش ها اشتري حاجه اصل انا مسرف جدا ...

انا :

( انا في سري ..اجبروك ...اومال كان ناوي يقف على رجله امتى ولا يلتفت لمستقبله امتى )
فناوي ارجع مصر علطول ان شاالله حتى اعيش على قدي ....
( يعيش على قده ...على اساس انه عايش مليونير هنا )

فقولتله ...ربنا يكتب ليك الخير دايما والمكان ال رزق الانسان فيه يسعى فيه ولازم الانسان يتعب في شبابه عشان يقدر يرتاح وهو كبير ...
قالي ... انا خلاص عجزت وتعبت ..
انا :
هو : انا جبت اخري من البلد دي ...ده انا عمري ما روحت شغلي في معاده ...عمري ما بقدر اصحى بدري ..

انا مش فاهم جوز اختك بيقدر يصحى 5 الفجر ازاي ... ده البيت كله بيفضل يصحي فيا وولاد اختي قبل ما يروحوا المدرسه يقعدوا يصحوني وبردوا بروح متأخر ..
انا : قولتله عادي ... جوز اختي شغله كده وبعدين الناس بتصحى الساعه 5 وقبل 5 كمان عشان صلاة الفجر فده وقت عادي ..
قال : اه انا كنت بصحى في رمضان اصلي الفجر بس كنت برجع انام ....

انا :

( انا في سري ..طيب لما يبقى عنده شغل في مصر ومش بالساهل اصلا تتحرك في مصر وفيه بهدلة مواصلات وبهدلة اصحاب الشغل ..هنا معاه عربيته ..مش مطلوب منه حاجه ... بيشتغل على مكتب والمكيف شغال فوق راسه وبيقول كده اومال لو نزل مصر ها يعمل ايه )
( وشغل بالي ساعتها ..ده لو مسؤول عن بيت وعنده اطفال وبيروحوا مدرسه ...واضح اني لو انا اتجوزته اني انا ال ها اشيل الليله دي كلها على راسي وكمان ادور على شغل بره ما هو ها يكون معظم ايام الشهر مش عاوز يصحى عشان يروح الشغل اصله قرفان ولا زهقان )

_______________________________________________________

قالي بتفكري تشتغلي بعد الجواز ...
قولت ..ما اعتقدش لانه صعب اوفق بين الشغل والبيت ها يبقى ضغط عليا وانا بحب لما اعمل حاجه اتقن فيها ولو مسكت حاجتين معتقدش ها اقدر ..
قال : انا اختي بتشتغل عادي وبتشتغل مدرسه ..
ما ردتش عليه ..
قال : هيا اختك او مرات اخوكي بيشتغلوا ..

قولت مرات اخويا لأ .. اختي بتشتغل ودوامها مش كل يوم فالبتالي مرتاحه في شغلها ..
قال : ايه هواياتك ...

قولتله بحب اقرا واتفرج على التلفزيون ..
قال : انا بحب اصطاد سمك وبقضي معظم وقتي بره البيت عشان مخنوق جدا من البيت ..ده حتى لما بفكر اخرج هنا ما بلاقيش مكان عدل يتخرج فيه ..
( انا اصلا بكره صيد السمك .اصلا .)
قولت .. بالعكس فيه اماكن كتير حلوه ومش مهم المكان قد ما هيا مهمه الصحبه ... الصحبه في اي مكان بتخليه جنه ..
قالي : اه بس بردوا انا حفظت كل الاماكن هنا
انا :
بعدين قالي متهيئلي عرفتي عني كل حاجه ...وان حصل نصيب الجواز في خلال سنتين ...عشان ما عنديش مقدره دلوقتي ...
انا : ( كنت بصور ساعتها فيلم الاخرس والصمت )
طبعا في خلال كلامه كان الجو اتملى دخان سجاير وشرب قهوه كتير ..وقولت في سري يا ريتني بعرف اقرا الفنجان ...ولو حتى ما بعرفش ..زكنت ها اقوله طريقكك مسدود مسدود مسدود يا ولدي ...
طبعا في خلال الوقت ال قعدته كان حوالي ساعه ... حسيت وقتها انه مر عليا دهر ...لاني سمعت في ساعه كمية احباط تجيبلي عته سنه كامله ...
ما بحبش الاحباط ولا الانهزاميه ... انا ببص للحياه على ان الامل لسه موجود والخير جاي ولسه فيه بكره ...
ده حسسني انه مش ها يقدر يواصل لبعد بكره ..وكمان سنه يقول يلا حسن الختام ...
متهيئلي ده اسوء من تنت بمراحل ..
ده على الضغط وجابلي احباط وماكنتش طايقه نفسي ... وكنت قلقانه على المراره صراحه ...
كان نفسي حد يسكته ...حد يضربه ..اهو اي حاجه تريح البشريه من الكائن ده ...
ووقتها ابص لجوز اختي اشاورله عشان ياخد باله اني عاوزه امشي ... وفين وفين على ما اخد باله ..

وما صدقت مشيت ..

في انتظار استفسارتكم وتعليقاتكم على رقم الموضوع ..( نقطه نقطه نقطه نقطه نقطه ) او ( 00000000 )

ناس شغالين ظباط ...

الكلام ده لما كنت في الصيف ال فات ...

صديق لوالدي كان فرح ابنه وابنه ده ظابط فطبيعي الفرح في ظباط كتير والبنات كمان في الفرح كانت بتستهبل ( ها ابقوا احكلكوا موقف منفصل عن استهبال البنات في افراح الظباط ) واظطريت بجد اروح لاني عادة ما بحبش اروح الافراح ال لو كان حد من اخواتي او اصدقاء الجامعه غير كده لو مين ما بروحش افراح انا ... المهم احنا كنا حضرنا كلنا الفرح ده .... من الفرح ده جه اتنين ...

اول بنو ادم كان عمه يبقى صديق والدي ده .... وكان انسان سمج للغايه ... المفروض اني عارفه ان عمه ده طلب من بابا انه يعمله فيزا وللأسف كل ما بابا يقدم له ورق يتوافق على كل الناس وده يترفض ... وبقاله سنين كل ما يقدم يترفض وناس جات وناس راحت وده ما اتوافقش على ورقه ابدا ... عرفت انه ما بيشتغلش في مصر ... وعرفت انه كمان دبلوم يعني مرفوض بالتلاته ... ( ده ال عرفته عن العريس ) ..

المهم عمه ده كا ن ..معشمه ..جامد ومفهمه ان بابا موافق .... وانننا موافقين ... وانه بس يقولي كلمتين ها ادوب في غرامه ... في اليوم ده بابا اكد عليا ضروري احضر الفرح فقولتله ماشي نحضر اهو تغير جو ...

المهم ان العريس عمه فهمه اني جايه الفرح عشان يحصل اللقاء ده وقاله استعد يا فارس يا مغوار ...

كنت قاعده على تربيزه مع اهلي ... وروحت غصب عني وخصوصا لما عرفت باللقاء المدبر ده ... بس قولت عادي ...

لما كنا قاعدين شويه وهو جه ... الشاب ده وقعد معانا على تربيزتنا ....وكل شويه يبص بطرف عينه الحركات القديمه دي ... وكل شويه يبص ...قمت ريحته خالص واديته ظهري اهو اريحه من الخيله ال هو فيها دي ...
قعد يتكلم مع بابا وجوز اختي واخويا .... التلاته زهقوا منه .....
خلص الفرح واحنا طالعين لقيت عمه جاي ورانا وبيقول ها هيا البنت قالت ايه ...بابا قاله اسالها هيا ...

فبيسألني ..فقولتله اسفه يا عمي بس مفيش قبول ...اهو حاجه تتقال بالزوق وخلاص ...

قام صديق والدي ده قعد يقولي .... انتي ها تقولي لا كتير وها تندمي بعد كده لتكوني فاكره انه طمعان فيكم ولا حاجه ... اببدا ... وبعدين ده انسان كويس .... وعنده كيت وكيت وكيت ...
لو رفضتيه ها تندمي ( ما انا اصلا رفضته ... )

---------------------------------------------------------------------------------------

وقام حكالي قصة الاتنين الستات الاغنيا ال فضلوا يرفضوا العرسان لغاية ما عنسوا وماتوا لوحدهم في قصرهم ال في الحته الفلانيه ..

تخيلوا كل الكلام ده على باب القاعه ...يعني احنا مروحين وهو بيديني الدرس الفزيع ده عن الرفض والعنوسه والموت محروقه وحيده ...يادي النيله ...

( وبعدين وقفته دي ..كان فيه واد امور نازل من الفرح ورانا وكان متابعني طول الفرح يعني عمي ده قطع الميه والنور عني ...ادعي عليه بايه بس ... يلا مالناش نصيب ...

خلص اليوم على كده ...هو صديق والدي اتصل ببابا كتير وعنده امل اني اوافق ...وقعد يقول لبابا ..ده قالي ان نورماندي اديته ظهرها في الفرح ...ده قالي انه ما عبرتهوش ...ده قعد يعيط ...ويقول ليه يعملوا فيا كده ...

ما احنا قولنا خلاص ...يعني ها يحننوا قلبي عليه لما يعيط ...ما يعيط انا مالي انا ...يمكن كان عاوزني اواسيه والله ما جاتش على بالي كنت بعتله طرد مناديل كلنكس وشريط دمرتني .... لانني ...كنت يوما احبها احبها ...بتاع حليم ...

ايه فيلم الشهد والدموع ال عاوزينه اشوفه غصب واقتدار ده ...

قولنا لأ خلاص ...خلصت ...

----------------------------------------------------------------------------------------------
بعد كده بحوالي 10 ايام كان فرح ابنه التاني اصله جوز اولاده الاتنين في نفس الشهر تقريبا ... طبعا انا ما روحتش الفرح التاني ولحسن حظي كان فرح واحده صاحبتي من ايام الجامعه فكانت حجه قويه اني ما اروحش ...
ماما وبابا واخويا راحوا ....
وهما داخلين الفرح ... طبعا في الريسيبشن بتاع القاعه ال ها يتعمل فيه فرح في باقات ورد ...للناس المهنئين ....
ماما داخله ومفيش حد معاها غير بابا واخويا والريسيبشن نفسه ما كانش فيه ناس ...
فجأه طلع الاخ ده من ورا بوكيه من بوكيهات الورد ...كان مختفي ... ورايح قايل لو سمحت يا طنط ممكن اتكلم معاكي شويه ...
فماما قالت لبابا واخويا اطلعوا وانا ها اجي وراكوا علطول ...
هو بقى العريس الهومام ...قعد يعيط ... ويقول لماما هيا ليه ادتني ظهرها في الفرح بعدين عمي كان قايلي انكم موافقين وانكم ها تجبيلوا فيزة سفر ..
انا اصلا ما كنتش اعرف عن الموضوع ده حاجه وعمي هو ال وعدني ... وبعدين انا اصلا ما عنديش غير 8000 جنيه وما بشتغلش بس عمي هو ال قالي .... ده حتى ما بعرفش اتكلم وعمي قالي اقعد مع ولاد عمك يعلموك تتكلم مع البنات ازاي ..ده حتى قبل الفرح روحت اشتريت بدله وكنت فرحان ...
انتوا بقى مش موافقين ليه ...والله لوريكوا ... انا ها اعرف اخليكوا ما تتطلعوش من البلد دي ...انا ها اوريها ...هيا ترفضني ليه ...

قامت ماما قالتله يا ابني كل شيء قسمه ونصيب وقالت لي ان دمها كان بيغلي بس ده فرح وعيب نكون سبب بوظانه ....ولسه بتتحرك عشان تتطلع القاعه ال فيها الفرح ..
قام شددها من كمها قالها كمان بتسبيني من غير ما اكمل كلامي ..

-----------------------------------------------------------------------------------

ماما اتنرفزت عليه ... وساعتها اخويا كان نزل لانه لاحظ ان ماما اتاخرت ...فلاقها وشها لونه متغير قالها في حاجه ...
قالتله لأ .. وطلعوا الفرح ...
طبعا ماما حكت لبابا واخويا على كل ال حصل ... وقالتله خلي الفرح يعدي على خير ... مش عاوزين نعمل مشاكل ونتكلم مع عمه بعد الفرح ...
بعد الفرح بابا كلم صديقه ده وقاله ال حصل يوم الفرح ...
ما كانش لسه فات يومين على الفرح ...بابا راح لقى اولاد صديقه الاتنين واتنين كمان ما يعرفهومش وهو العريس ده ..
طبعا بابا حكى ال حصل قدام الناس ... واخد حقه منهم وكمان باع عربيته القديمه لهم ... كنا زاهقنين منها وبتعطل كتير ..واهو الخناقه جات بفايده ...
طبعا في الفتره دي كان معمول حظر تجول ليا وما امشيش الا بحد من اهلنا الشباب يعني لازم حد يمشي معايا احتياطي ..
بس خدتوا بالكوا ...عشان عمه وولاد عمه كلهم ظباط اعتقد انه ها يمشي الكون على مزاجه ...

---------------------------------------------------------------------------------------

الاخ التاني ال جه من نفس الفرح ده كان ظابط وبابا اصلا رافض فكرة ان بنت من بناته يتجوزها ظابط ..
ده مبدأ عند بابا ..بناتي ما يتجوزوش لا ظابط ولا خليجي ...
ففي واحد كلم والدي وقاله ان فلان الفلاني عاوز يتقدم وهو كذا وكذا وظابط ...بابا اعتذر منه بطريقه لبقه ...
وصل لنا كلام ان الاخ ده بيقول مين هما عشان يرفضوني ... طيب انا ها اعرفهم ..
ايه القرررف ده ...طبعا برضوا والدي كلم صديقه ده وقاله ... وهو قالوا ما تقلقش انا عارف الظابط ده وها اتصرف معاه ...
ال عاوزه افهمه ... ناس قالت لأ ايه المشكله عند الناس التانيين ... ....
بجد ربولي الرعب في الفتره دي ...انا قولت خلاص يا نورماندي ...شكله ها تموتي متشوه ...طبعا شغل الافلام كله اتعرض ليلتها في دماغي ...وقعدت اتخيل واحد ها يطلع ويقوم كابب عليا مية نار عشان ينتقم ولا يروح مشوهني بمطوه وابقى نورماندي ام بشله بدال نورماندي 3 وخلاص بقى .... وموسيقى تحية العلم والضوء الشارد والمال والبنون وذئاب الجبل كلها تشتغل ساعتها ...
بس عارفين كل ال حصل ده ..ما تعبنيش قد الكائن الهلامي اللازج ( رقم اتنين ) ال اتكلمت عنه قبل كده ...

تابعونا مع العريس ال بعده ..

نيكسسسسسسسسسسسست

الرااااااااااااابع

مش فاكره التوقيت بالزبط بس ده كان قبل سفري لمصر ....

صديقه لماما اتصلت بيها وقالت لها ان فيه فلان الفلاني عاوز يتقدم لبنتكم نورماندي .... وياريت تحددوا موعد ... يقعدوا الاتنين مع بعض ويشوفوا بعض ....

اتحدد موعد الاول ان اخويا وجوز اختي يروحوا يشوفوه ويقعدوا معاه .... قعدوا معاه ... وقالوا عليه مبدئيا احنا شايفنه شخصيه كويسه ,...وانهم ها حددوا موعد تاني عشان انا اقعد معاه ...

اتحدد الموعد وروحت ... روحنا كافيه ...فاكرين الكافيه ال اتكلمت عليه في العريس التاني ...هو نفس الكافيه بس فرع تاني ....

المهم روحنا لقيته قاعد هناك ... جوز اختي واخويا كانوا معايا ... قعدنا كلنا في الاول مع بعض بعدين اخويا وجوز اختي نقلوا على التربيزه ال جمبنا ...

هو بدا يتكلم عن نفسه ..انا اسمي فلان ... خريج تجاره انجليزي ..عمري قد كده ... بشتغل في البنك الفلاني ... مرتبي قد كده ...

سالني وانتي ...قولتله انا خريجة كذا وبشتغل في الحته الفلانيه ...

قعد يكلمني عن دراسته وانه درس في جامعة حلوان وانه اخد كورسات كتير من الجامعه الامريكيه وانه كان متوقع انه بشهاداته دي ها يكون يا ما هنا يا ما هناك ولما جه هنا واشتغل في الوظيفه دي وبالمرتب ده ما كانش متوقع خالص ...

( اصلا البنك ال بيشتغل فيه رواتبه عاليه جدا انا عارفه ده ..والراتب ال بيتكلم عنه ده بياخده ال بيجيب الفلوس من البنك المركزي للفرع ) يعني مالوش علاقه اصلا بالوظيفه ال اتكلم عنها وال هيا في الصرافه نفسها والتعامل مع الجمهور ...صعب جدا جدا يكون ده راتبه ... بس ال فهمناه بعدها انه اصلا مش بيشتغل الوظيفه ال قال عليها وانه بيشتغل الوظيفه التانيه ال انا قولت عليها .

كنا في الوقت ده طلبنا ...

اخدت انا عصير ..

هو اخد كوكتيل ايس كريم مع فواكهه ...

شربت انا عصيري ..وهو كان بياكل الكوكتيل بتاعه وفضل منه كتير قام قالي ما تاخديه تكمليه .... نعم اخده اكمله ...بتاع ايه اخده اكمله ده ... واكل كمان مطرحه ...على اساس اننا عارفين بعض من اللفه ... ومتربيين مع بعض فاكل عادي مكانه ...

غير انه اصلا وهو بيتكلم كان فيه نقط بيضه بتطلع من بقه وانا كنت براقب بتوصل لحد فين وكانت بتقع في الكوبايه اصلا ...

وانا في سري قاعده اقول ..يع ..

وشويه النقطه تبقى جايه ناحيتي ...شويه اروح يمبن ...شويه اروح شمال ولا الحضري في متش بطولة الامم ...بصد ايه ..طبعا عرفتوا ايه النقط دي ...مش محتاجه شرح ...

---------------------------------------------------------------------------------
قالي في الكلام ...انه من المنيا وانه عنده اخوات قد كده وان له اخ اكبر بس عنده فشل كلوي ...وراح قايلي انا بقولك عشان ما اكونش خبيت عنك حاجه ...
طيب اخوه عنده فشل كلوي ...ايه علاقته بيا ...وايه علاقته بالموضوع ال بنتكلم فيه ...
ها اروح مثلا احلل معاهم ... ولا اعمل حسابي على كليه اتبرع بيها ...ولا بينبهني ان الموضوع ده وراثي واني ها اترمل بدري بدري ...او اشتغل ممرضه له ...
انا ماااااااااااااالي ...هو ربنا يشفيه ويعافيه .....
انا مالي عنده فشل كلوي ولا لأ ...يقولي ليه انا ....جاي يتكلم في جواز ...ايه ال جاب معمل البرج ساعتها ...
وبعدين قالي انه عاوز يجيب شقه في المعادي ...بس الاسعار غاليه جدا ...وهو مش حملها خالص ...
وبعدين اتكلمنا عن اني معايا رخصة سواقه وان الواحد ما يننفعش يمشي في البلد من غير عربيه ..
قالي انا بقى ما عنديش عربيه وكل يوم جوز اختي بيوصلني الشغل الصبح ونفسي اجيب عربيه سوده كورولا (انا قولت يع ) الكورولا السودا اصلا مش حلوه بالمره ...الاسود فيها ماحدش بياخده ....
وعشان ما عندوش عربيه فا مبيخرجش في حته خالص وانه بيرجع الشغل وبما انه قاعد مع اخته وجوز اخته في نفس الشقه فا بيقعد طول النهار مع بنات اخته ...
اتكلم في حاجات كتير مش فاكراها وكان بيقعد يقول كلام ما بيضحكش خالص ويقعد يضحك عليه فا مجاملة له كنت بضحك ....

-----------------------------------------------------------------
وبعدين وسط كل الكلام بيقولي ...هو انتي بتحبي تروحي تاكلي في مطاعم ...انا استغربت ...فرديت عليه وقولتله اه باكل في مطاعم ..هو في حاجه ...هو سكت وما اتكلمش ...
بعدين لقيت اخويا بيتحرك ناحية الكاشير عشان يدفع الحساب ...فبعد اخويا ما دفع ...قعد يقول ليه بس الاحراج ده ليه اخوكي يدفع الحساب ده كلام ...
اصلا اصلا احنا كنا طولنا وكان لازم يقوم واصلا انا سكت عن الكلام من بدري وهو بيتكلم كلمه من الشرق وكلمه من الغرب ...طيب لقيت الكلام خلص ما طلبتش الفاتوره ليه ما دام بتضايق قوي كده ان اخويا هو ال دفعها ...
المهم اخدناه معانا ووصلناه بيتهم ...ورجعنا ...
مبدئيا انا قولت خليني استخير عشان ماحدش يلومني لولا قدر الله رفضت ... لان كان جوايا شعور غريب ان فيه غلط مش مظبوطه ..
ثانيا ..انا صعب بالنسبه ليا اروح اسكن في الصعيد ...وخصوصا انه من المنيا وشقته هنام يعني لو كنت اتجوزته فطبيعي ها يقعد في بلده ... بس انا قولت اشوف الاول موضوع القاهره ده وهل حقيقي ها ياخد شقه في القاهره ولا
لأ ...

اخويا وبابا قالوا ها يسالوا عليه ...
المهم بعد السؤال عنه ...طلع الاخ بخيييييييييييل .... وبخيل جدا كمان ...طبعا ده كان واضح جدا من كلامه بس انا عملت نفسي مش واخده بالي ..

غير كده ماما قالتلي ان اول مكالمه حصلت بينها وبين اخته ... اخته بتقول لماما هيا بتعرف تطبخ ...ماما قالتلها اه طبعا ...راحت راده اخته وقايله اصل انتوا عارفين اكل المطاعم هنا غالي ومش معقول يعيشوا على المطاعم ولا المعلبات ...
طبعا حتة بخيل والكلام ال اخته قالته ... وكمان من الصعيد ..
وكله كوم وحتة كملي الشوب بتاعي كوم لوحده ..

ووسط كلامه كان بيقولي مشكله الواحد شغال في بنك بقوله ليه ..قالي اصل كل شويه عيد ميلاد فلان وفرح علان ولازم نهادي ونجامل وانا ماليش في الكلام ده ...

كل ده خلاني اقول ... ما كانش اتعذر .... بالسلامه ...